শৰীৰত ভিটামিন এ (Vitamin A)-ৰ ভূমিকা, উপকাৰিতা, অত্যাধিক সেৱনৰ ফলত হʼব পৰা ক্ষতি, অভাৱৰ ফলত হʼব পৰা ৰোগ, ভিটামিন এ সমৃদ্ধ খাদ্য, শিশুৰ বাবে অনুমোদিত পৰিমাণ আৰু FAQ
ভিটামিন-এ কি? | What is Vitamin A?
ভিটামিন এ (Vitamin A) হৈছে অসংপৃক্ত মনোহাইড্ৰিক এলকহলৰ এটা গোট য’ত এলিচাইক্লিক আঙুঠি থাকে। ই পানীত অদ্ৰৱণীয় কিন্তু চৰ্বি দ্ৰৱণীয়। ভিটামিন এ হৈছে বিভিন্ন চৰ্বি-দ্ৰৱণীয় পদাৰ্থ যেনে ৰেটিনল, ৰেটিনিল পালমিটেট, আৰু বিটা-কেৰোটিন অন্তৰ্ভুক্ত কৰা এক সাধাৰণ শব্দ। দৃষ্টিশক্তি, কোষীয় পৃথকীকৰণ, এপিথেলিয়াল বেৰিয়াৰ ফাংচন, আৰু ৰোগ প্ৰতিৰোধ কাৰ্যৰ বাবে ইয়াৰ বিভিন্ন বিপাক অত্যাৱশ্যকীয়।
ভিটামিন এ, অন্যান্য ভিটামিন, খনিজ আৰু অন্যান্য যৌগৰ সৈতে, এক অত্যাৱশ্যকীয় মাইক্ৰ’নিউট্ৰিয়েণ্ট। ইয়াৰ অৰ্থ হৈছে যে আমাৰ শৰীৰে ইয়াক নিজাকৈ প্ৰস্তুত কৰিব নোৱাৰে আৰু সেয়েহে আমি ইয়াক আমাৰ আহাৰৰ জৰিয়তে দেহত লʼব লগা হয়।
মানৱ শৰীৰত ভিটামিন এ (Vitamin A)-ৰ ভূমিকা
খাদ্যৰ পৰা শৰীৰে আহৰণ কৰা ভিটামিন এ শৰীৰত প্ৰয়োজন নোহোৱালৈকে যকৃতত সংৰক্ষিত হৈ থাকে আৰু প্ৰয়োজন অনুসাৰে শৰীৰৰ বিভিন্ন অংশলৈ পৰিবাহিত হয়। তাৰ আগতে ই প্ৰ’টিনৰ সৈতে লগ লাগি থাকে।
আগলৈ এই প্ৰৱন্ধটিত মানৱ শৰীৰত ভিটামিন এ-ৰ প্ৰয়োজনীয়তা আৰু জড়িত অন্যন্য তথ্যৰ বিষয়ে আলোচনা কৰা হʼব।
Also Read: তুলসী চাহৰ উপকাৰিতা: ১১টা ঔষধীয় ব্যৱহাৰ | Basil Tea Benefits
মানৱ শৰীৰত ভিটামিন এ-ৰ কাম কি? | Role of Vitamin A in the Human Body
ভিটামিন এ বহুতো শাৰীৰিক প্ৰক্ৰিয়াৰ বাবে অত্যাৱশ্যকীয়, যাৰ ভিতৰত আছে সকলো পৃষ্ঠৰ কোষকলাৰ অখণ্ডতা আৰু কাৰ্য বজাই ৰখা (এপিথেলিয়া): উদাহৰণ স্বৰূপে, ছাল, শ্বাসনলীৰ আৱৰণ, অন্ত্ৰ, মূত্ৰাশয়, কাণ আৰু চকুৰ ভিতৰৰ অংশ।
ভিটামিন এ-য়ে ছালৰ কোষবোৰ দৈনিক সলনি কৰাত সহায় কৰে আৰু নিশ্চিত কৰে যে কঞ্জাক্টিভা (Conjunctiva)-ৰ দৰে কোষকলাবোৰে শ্লেষ্মা উৎপাদন কৰিবলৈ আৰু সংক্ৰমণত বাধা প্ৰদান কৰিবলৈ সক্ষম হয়।
কম পোহৰত ভাল দৃষ্টিশক্তিৰ বাবে, এক স্বাস্থ্যকৰ ৰোগ প্ৰতিৰোধ প্ৰণালী বজাই ৰখাৰ বাবে, শাৰীৰিক-মানসিক বিকাশৰ বাবে আৰু প্ৰজননৰ বাবে ভিটামিন এ অত্যাৱশ্যকীয়।
ভিটামিন এ-য়ে শৰীৰৰ বহুতো প্ৰণালী সমৰ্থন কৰে। এই কাৰণে, ভিটামিন এ-ৰ অভাৱক এতিয়া ভিটামিন এ-ৰ অভাৱৰ বিকাৰ (Vitamin A Deficiency Disorder) বুলি কোৱা হয়।
শৰীৰত ভিটামিন এ–ৰ উপকাৰিতা | Vitamin A Benefits in the Body
১) চকুৰ বাবে (For Eyes)
আপোনাৰ দৃষ্টিশক্তি সংৰক্ষণৰ বাবে ভিটামিন এ অত্যাৱশ্যকীয়। আপোনাৰ চকুৰ পৰতত আহি পৰা ৰশ্মিক বৈদ্যুতিক সংকেতলৈ ৰূপান্তৰ কৰি মগজুলৈ প্ৰেৰণ কৰিবলৈ এইবিধ ভিটামিনৰ প্ৰয়োজন হয়। এই ভিটামিন বিধৰ অভাৱত আপোনাৰ ৰাতিৰ অন্ধত্ব (Night Blindness) হʼব পাৰে।
২) কেন্সাৰৰ বিপদাংশা হ্ৰাস (Reduced the risk of Cancer)
যেতিয়া অস্বাভাৱিক কোষবোৰ অনিয়ন্ত্ৰিত ভাৱে বৃদ্ধি বা বিভাজিত হ’বলৈ ধৰিলে তাক কৰ্কট ৰোগ হোৱা বুলি কোৱা হয়। যিহেতু ভিটামিন এ-য়ে আপোনাৰ কোষৰ বিকাশত এক গুৰুত্বপূৰ্ণ ভূমিকা পালন কৰে, সেয়ে কৰ্কট ৰোগৰ বিপদাশংকাৰ ওপৰত ইয়াৰ প্ৰভাৱ আৰু কৰ্কট ৰোগ প্ৰতিৰোধত ইয়াৰ ভূমিকা আছে। পৰ্যৱেক্ষণমূলক অধ্যয়নত, বিটা-কেৰোটিনৰ ৰূপত অধিক পৰিমাণৰ ভিটামিন এ খালে ই কিছুমান প্ৰকাৰৰ কৰ্কট ৰোগৰ বিপদাংশা হ্ৰাস কৰিব পাৰে বুলি জনা গৈছে, যাৰ ভিতৰত আছে হজকিন্স লিম্ফোমা, লগতে গ্ৰীৱা, হাঁওফাঁও আৰু মূত্ৰাশয়ৰ কৰ্কট।
৩) ৰোগ প্ৰতিৰোধ প্ৰণালী (Immune System)
ভিটামিন এ-য়ে আপোনাৰ শৰীৰৰ প্ৰাকৃতিক প্ৰতিৰক্ষা প্ৰণালী বজাই ৰখাত এক গুৰুত্বপূৰ্ণ ভূমিকা পালন কৰে। ইয়াত অন্তৰ্ভুক্ত থাকে আপোনাৰ চকু, হাঁওফাঁও, অন্ত্ৰ আৰু যৌনাঙ্গৰ শ্লেষ্মা প্ৰতিবন্ধকতা যি বেক্টেৰিয়া আৰু অন্যান্য সংক্ৰামক এজেণ্টক আৱদ্ধ কৰে। ই শ্বেত ৰক্ত কণিকাৰ উৎপাদন আৰু কাৰ্যত অন্তৰ্ভুক্ত থাকে, যিয়ে আপোনাৰ তেজৰ প্ৰবাহৰ পৰা বেক্টেৰিয়া আৰু অন্যান্য বীজাণু চিনাক্ত কৰা আৰু পৰিষ্কাৰ কৰাত সহায় কৰে।
৪) ব্ৰণৰ প্ৰতিৰোধী (Acne Resistant)
শালমইনা হৈছে এক দীৰ্ঘম্যাদী, প্ৰদাহজনক ছালৰ বিকাৰ। এই স্থিতি থকা লোকসকলৰ বেদনাদায়ক দাগ আৰু ব্লেকহেড বিকশিত হয়, সাধাৰণতে মুখ, পিঠি আৰু বুকুত। এই দাগবোৰ তেতিয়া হয় যেতিয়া চেবেচিয়াছ গ্ৰন্থিবোৰ মৃত ছাল আৰু তেলৰ সৈতে বন্ধ হৈ যায়। এই গ্ৰন্থিবোৰ আপোনাৰ ছালৰ চুলিৰ ফলিকলত পোৱা যায় আৰু এইবোৰে চিবাম প্ৰস্তুত কৰে। চিবাম হৈছে এক তৈলাক্ত, মমযুক্ত পদাৰ্থ যিয়ে আপোনাৰ ছাল লুব্ৰিকেট আৰু জলৰোধী কৰি ৰাখে।
৫) হাড়ৰ বাবে (For Bones)
বয়স হোৱাৰ লগে লগে স্বাস্থ্যৱান হাড় বজাই ৰাখিবলৈ প্ৰয়োজন হোৱা মুখ্য পুষ্টিবোৰৰ ভিতৰত আছে- প্ৰ’টিন, কেলচিয়াম আৰু ভিটামিন ডি। অৱশ্যে, হাড়ৰ সঠিক বিকাশৰ বাবে পৰ্যাপ্ত ভিটামিন এ খোৱাটো প্ৰয়োজনীয়, আৰু এই ভিটামিনৰ অভাৱ হাড়ৰ দুৰ্বল স্বাস্থ্যৰ সৈতে সম্পৰ্কিত। দৰাচলতে, তেজত ভিটামিন এ-ৰ পৰিমাণ কম থকা লোকসকলৰ স্বাস্থ্যকৰ স্তৰ থকা লোকৰ তুলনাত হাড় ভঙাৰ আশংকা অধিক থাকে।
৬) স্বাস্থ্যকৰ বিকাশ আৰু প্ৰজনন বৃদ্ধি কৰে (Promotes Healthy Growth and Reproduction)
পুৰুষ আৰু মহিলা দুয়োৰে ক্ষেত্ৰত এক স্বাস্থ্যকৰ প্ৰজনন প্ৰণালী বজাই ৰখাৰ বাবে আৰু গৰ্ভধাৰণৰ সময়ত ভ্ৰূণৰ স্বাভাৱিক গঠন আৰু বিকাশ নিশ্চিত কৰিবলৈ ভিটামিন এ অত্যাৱশ্যকীয়।
প্ৰজননত ভিটামিন এ-ৰ গুৰুত্ব আছে। নিগনিৰ ওপৰত কৰা পৰীক্ষা আৰু অধ্যয়নে দেখুৱাইছে যে এইবিধ ভিটামিনৰ অভাৱৰ ফলত পুৰুষৰ শুক্ৰাণু কোষৰ বিকাশ অৱৰুদ্ধ হয়, যাৰ ফলত বন্ধ্যাত্ব হয়। গৰ্ভৱতী মহিলাৰ ক্ষেত্ৰত, ভিটামিন এ গৰ্ভজাত সন্তানৰ বহুতো মুখ্য অঙ্গৰ গাঁথনি আৰু বিকাশত ভূমিকা পালন কৰে, যাৰ ভিতৰত আছে কংকাল, স্নায়ুতন্ত্ৰ, হৃদযন্ত্ৰ, বৃক্ক, চকু, হাঁওফাঁও আৰু অগ্ন্যাশয়।
মন কৰিব লগীয়া কথা যে, গৰ্ভধাৰণৰ সময়ত প্ৰয়োজনতকৈ অধিক ভিটামিন এ-য়ে গৰ্ভৰ কেঁচুৱাক ক্ষতিগ্ৰস্থ কৰিব পাৰে আৰু ইয়াৰ ফলত জন্মগত বিকাৰ হোৱাৰ সম্ভাৱনা থাকে।
Also Read: গৰুৰ ঘিউৰ ১৪টা পুষ্টিগত লাভালাভ | Cow Ghee Benefits
অত্যাধিক ভিটামিন এ–ৰ ফলত হোৱা ক্ষতি | Effects of Vitamin A abundance
ভিটামিন এ হৈছে এক চৰ্বি-দ্ৰৱণীয় ভিটামিন, যি আপোনাৰ শৰীৰত সঞ্চিত হৈ থাকে। ইয়াৰ অৰ্থ হৈছে যে অতিৰিক্ত ব্যৱহাৰৰ ফলত বিষাক্ত স্তৰ হ’ব পাৰে।
হাইপাৰভিটামিনোচিছ এ (Hypervitaminosis A) আহাৰ বা পৰিপূৰকৰ জৰিয়তে অত্যাধিক পূৰ্বনিৰ্ধাৰিত ভিটামিন এ গ্ৰহণ কৰাৰ ফলত হয়। লক্ষণবোৰৰ ভিতৰত থাকিব পাৰে –
- ওকালি অহা (Nausea),
- মূৰ ঘূৰোৱা (Dizziness),
- মুৰৰ বিষ (Headache),
- বিষ আৰু আনকি মৃত্যু (Aches and even Death)।
যদিও ই অত্যাধিক ভিটামিন এ সমৃদ্ধ আহাৰ সেৱনৰ ফলত হ’ব পাৰে, পৰিপূৰক আৰু ঔষধৰ পৰা হোৱাটো তুলনামূলকভাৱে বিৰল।
ইয়াৰ উপৰিও, উদ্ভিদ ৰূপত যথেষ্ট পৰিমাণৰ প্ৰভিটামিন এ খোৱাটোৱে একে বিপদাশংকা বহন নকৰে, কিয়নো শৰীৰত ইয়াৰ সক্ৰিয় ৰূপলৈ ৰূপান্তৰ হোৱাটো নিয়ন্ত্ৰিত হৈ থাকে।
ভিটামিন এ-ৰ অভাৱত কি হʼব পাৰে? | What happens when you have Vitamin A Deficiency?
ভিটামিন এ-ৰ অভাৱৰ উৎকৃষ্ট প্ৰকাশ হৈছে জেৰোফথালমিয়া, যি হৈছে চকুৰ শুষ্কতাৰ সৈতে সম্পৰ্কিত এক বিকাৰ। জেৰোফথালমিয়াৰ ফলত ভিটামিন এ-ৰ অভাৱৰ বিভিন্ন অকুলাৰ অভিব্যক্তি হয়, নিশাৰ অন্ধত্ব, কঞ্জাক্টিভেল, আৰু কৰ্ণিয়াজেৰোচিছৰ পৰা কৰ্ণিয়াৰ আলচাৰেচন আৰু কেৰাটোমালাচিয়ালৈকে যাৰ ফলত চিকিৎসা নকৰিলে অৱশেষত অন্ধত্ব হয়।
ভিটামিন এ-ৰ অভাৱৰ আন এটা মুখ্য পৰিণাম হৈছে- গুৰুতৰ সংক্ৰমণৰ বিপদাশংকা বৃদ্ধি। সংক্ৰমণে শৰীৰৰ ভিটামিন এ-ৰ চাহিদা বৃদ্ধি কৰে আৰু সেয়েহে অভাৱটো অধিক বেয়া হয়। সেয়েহে শিশুৱে অভাৱ আৰু সংক্ৰমণৰ এক বিষাক্ত চক্ৰত জড়িত হ’ব পাৰে, যাৰ বাবে ভিটামিন এ-ৰ অভাৱক শিশুৰ মৃত্যুৰ এক গুৰুত্বপূৰ্ণ কাৰণ বুলি ব্যখ্যা কৰা হয়।
ভিটামিন এ সমৃদ্ধ খাদ্য | Foods that are Rich in Vitamin A
ভিটামিন এ-ৰ দুটা মুখ্য উৎস আছে: জন্তুৰ উৎস আৰু উদ্ভিদৰ উৎস। ভিটামিন এ-ৰ সকলো উৎস শোষণত সহায় কৰিবলৈ আহাৰত কিছু চৰ্বিৰ প্ৰয়োজন। প্ৰাপ্তবয়স্ক পুৰুষৰ বাবে অনুমোদিত দৈনিক ভিটামিন এ-ৰ পৰিমাণ হৈছে ৯০০ মাইক্ৰ’গ্ৰাম (mcg) আৰু প্ৰাপ্তবয়স্ক মহিলাৰ বাবে ৭০০ মাইক্ৰ’গ্ৰাম।
জন্তুৰ উৎসত, ভিটামিন এ ৰেটিনল হিচাপে পোৱা যায় যি হৈছে ভিটামিন এ-ৰ ‘সক্ৰিয়’ প্ৰকাৰ। মাছৰ যকৃতকে ধৰি অন্য জন্তুৰ যকৃত হৈছে এক অতি ভাল উৎস। অন্যান্য জন্তুৰ উৎস হৈছে কণীৰ কুহুম (বগা নহয়) আৰু দুগ্ধজাত সামগ্ৰী যেনে গাখীৰ (মানুহৰ মাতৃদুগ্ধ সহ), চীজ আৰু মাখন। জন্তুৰ পেশীৰ পৰা মাংস, এক ভাল উৎস নহয়।
উদ্ভিদৰ উৎসত কেৰোটিনইডৰ ৰূপত ভিটামিন এ থাকে যাক শৰীৰে ব্যৱহাৰ কৰাৰ আগতে হজমৰ সময়ত ৰেটিনললৈ ৰূপান্তৰ কৰিব লাগে। কেৰোটিনইড হৈছে ৰঞ্জক যিয়ে উদ্ভিদবোৰক এইবোৰৰ সেউজীয়া ৰং আৰু কিছুমান ফল আৰু পাচলিৰ ৰঙা বা কমলা ৰং দিয়ে।
ভিটামিন এ-ৰ উদ্ভিদৰ উৎসৰ ভিতৰত আছে- আম, অমিতা, বহুতো স্কোয়াছ, গাজৰ, মিঠা আলু আৰু মাকৈ (কিন্তু বগা প্ৰকাৰৰ নহয়)। ভিটামিন এ-ৰ অন্যান্য ভাল উৎস হৈছে ৰঙা পাম তেল আৰু বিৰুটি পাম তেল। (টোকা: যদি এই তেলবোৰৰ ৰং আঁতৰাবলৈ উতলায় তেন্তে ভিটামিন এ ধ্বংস হয়।)
কিছুমান ফল আৰু পাচলি আনবোৰতকৈ হজম কৰিবলৈ সহজ, আৰু দেখা গৈছে যে গাঢ় সেউজীয়া শাক যেনে- পালেং শাক বা অমৰান্থ হজম কৰা কঠিন। ৰন্ধাৰ পিছত এই পাচলিবোৰক পিটিকা কৰি দিলে সেইবোৰ হজম কৰা সহজ হৈ পৰে। যেতিয়া পিটিকা কৰা হয় সেইবোৰক ভাত বা খিছিৰিত যোগ দিব পাৰি আৰু শাক-পাচলি খাই বেয়া পোৱা শিশুক সহজে খোৱাব পাৰি।
এইটো গুৰুত্বপূৰ্ণ যে ভিটামিন এ-ৰ সকলো উৎস অত্যাধিক ৰান্ধিব নালাগে, কিয়নো ই ভিটামিন এ-ৰ পৰিমাণ হ্ৰাস কৰিব পাৰে। অতিবেঙুনীয়া পোহৰে খাদ্যৰ ভিটামিন এ-ৰ পৰিমাণ হ্ৰাস কৰিব পাৰে, সেয়েহে আমৰ দৰে ফল শুকুৱাটো পোনপটীয়া সূৰ্যৰ পোহৰত কৰিব নালাগে।
স্থানীয় কাৰ্বোহাইড্ৰেটৰ ওপৰত যথেষ্ট নিৰ্ভৰ কৰা আহাৰ, যেনে চাউল, ফুফু, উগালি, কাচাভা, বাজৰা আৰু জোৱাৰ আদিত ভিটামিন এ-ত বহুত কমকৈ থাকে, পুষ্টিৰ বাবে এইবোৰৰ সৈতে ভিটামিন এ-সমৃদ্ধ খাদ্য যোগ দিয়া হয়।
শিশু এটাক কিমান ভিটামিন এ প্ৰয়োজন? | How much Vitamin A is needed by a Child?
যিহেতু শিশুবোৰৰ দেহ বিকাশৰ গতিত থকে, তেওঁলোকক তুলনামূলকভাৱে অধিক ভিটামিন এ গ্ৰহণৰ প্ৰয়োজন; প্ৰাপ্তবয়স্কৰ তুলনাত প্ৰায় আধাখিনিয়ে বেছিকৈ। উচ্চ গ্ৰহণৰ আন এটা কাৰণ হ’ল শিশুৰ সংক্ৰমণ হোৱাৰ সম্ভাৱনা তুলনামূলকভাৱে বেছি থাকে যিয়ে বিপাকীয় হাৰ বৃদ্ধি কৰে আৰু সেয়েহে তেওঁলোকে ভিটামিন এ ব্যৱহাৰ কৰাৰ হাৰ বৃদ্ধি হয়।
মাতৃদুগ্ধত ছয় মাহ বয়সলৈকে শিশুৰ বাবে পৰ্যাপ্ত ভিটামিন এ থাকে, কিন্তু তাৰ পিছত পৰিপূৰক খাদ্যত (মাতৃদুগ্ধৰ উপৰিও দিয়া খাদ্য) কম পৰিমাণৰ ভিটামিন এ থাকিব লাগে।
সৰু শিশুৰ বাবে, ভিটামিন এ সমৃদ্ধ এক সন্তুলিত আহাৰত অন্তৰ্ভুক্ত থাকিব লাগে দিনে কমেও ২-৩ টা ভিটামিন এ-সমৃদ্ধ ফল আৰু পাচলি, লগতে শোষণত সহায় কৰিবলৈ অলপ চৰ্বিযুক্ত খাদ্য।
সৰু শিশুৱে তেওঁলোকৰ আহাৰৰ বাবে তেওঁলোকৰ মাতৃ বা আন যত্ন কৰ্তাসকলৰ ওপৰত সম্পূৰ্ণৰূপে নিৰ্ভৰশীল, আৰু সেয়েহে সৰু শিশুৰ মাতৃ আৰু যত্ন লওঁতাই তেওঁলোকৰ সন্তানৰ বাবে এক স্বাস্থ্যকৰ আহাৰ কি সেয়া জনাটো গুৰুত্বপূৰ্ণ।
Also Read: গাখীৰ খালে শৰীৰত কি প্ৰভাৱ পৰে? | Effects of Milk in Human Body
সামৰণি | Conclusion
উক্ত প্ৰৱন্ধটিত ভিটামিন এ সম্বন্ধীয় তথ্য আৰু আপোনাৰ শৰীৰত ইয়াৰ গুৰুত্বৰ বিষয়ে আলোচনা কৰা হʼল। এই তথ্যবোৰ নিৰ্ভৰযোগ্য উৎস আধাৰিত। অধিক জানিবলৈ আৰু ভিটামিনৰ অভাৱ সম্বন্ধীয় কোনো সমস্যাৰ বাবে ডাক্তৰৰ কাষ চাপিব।
Sources: NCBI Article, NCBI
FAQ
১) হাইপাৰভিটামিনোচিছ (Hypervitaminosis) বুলিলে কি বুজায়?
উঃ- হাইপাৰভিটামিনোচিছ এ-ক ভিটামিন এ বিষাক্ততা বুলিও কোৱা হয়, ই হৈছে শৰীৰত অত্যাধিক ভিটামিন এ থাকিলে হোৱা এক স্থিতি। অৱস্থাটো তীব্ৰ বা দীৰ্ঘম্যাদী হ’ব পাৰে:
- তীব্ৰ: সাধাৰণতে যদি ভিটামিন অত্যাধিক গ্ৰহণ কৰা হয়, কম সময়ৰ ভিতৰত।
- দীৰ্ঘম্যাদী: যদি দীঘলীয়া সময়ৰ বাবে ভিটামিন এ জমা হয়।
২) ভিটামিন এ-ৰ অভাৱ/অতিৰিক্ততাৰ বাবে অনুমোদিত পৰীক্ষাবোৰ কি?
উঃ- ভিটামিন এ তেজ পৰীক্ষা:
- অভাৱ: ৫০ mcg/DL-কৈ কম
- অতিৰিক্ত: ২০০ mcg/DL-কৈ অধিক
চিৰাম ৰেটিনলৰ স্তৰ:
- অভাৱ: ২৮μg/DL-কৈ কম
৩) যদি মই ভিটামিন এ-ৰ অভাৱৰ সন্দেহ কৰোঁ তেন্তে মই কোনজন চিকিৎসকৰ পৰামৰ্শ লোৱা উচিত?
উঃ- আপোনাৰ পাৰিবাৰিক চিকিৎসকৰ সৈতে কথা পাতক আৰু যদি আপুনি ভিটামিন এ-ৰ অভাৱৰ সন্দেহ কৰে তেন্তে আপোনাৰ উদ্বেগবোৰ কওঁক। বেছিভাগ পুষ্টিৰ অভাৱ দুৰ্বল আহাৰ আৰু অপুষ্টিৰ ফলস্বৰূপে হয় আৰু আপোনাৰ চিকিৎসকে আপোনাৰ খাদ্যাভ্যাসৰ পৰিৱৰ্তনৰ পৰামৰ্শ দিব পাৰে। তেওঁ কিছুমান পৰিপূৰক আৰু পৰীক্ষাও দিব পাৰে আৰু আপোনাক বিশেষজ্ঞৰ ওচৰলৈ প্ৰেৰণ কৰিব পাৰে।
৪) চৰ্বি দ্ৰৱণীয় ভিটামিন পানী দ্ৰৱণীয় ভিটামিনতকৈ কেনেকৈ পৃথক?
উঃ- চৰ্বি দ্ৰৱণীয় ভিটামিন পানী দ্ৰৱণীয় ভিটামিনতকৈ পৃথক, কিয়নো চৰ্বি দ্ৰৱণীয় ভিটামিনবোৰ চৰ্বি কোষত দীঘলীয়া সময়ৰ বাবে শৰীৰত সংৰক্ষণ কৰিব পাৰি আৰু অত্যাধিক সেৱন কৰিলে বিষাক্ততা হ’ব পাৰে। চৰ্বি দ্ৰৱণীয় ভিটামিনবোৰক হজমৰ সময়ত খাদ্যৰ পৰা তেজৰ প্ৰবাহত শোষণ কৰাৰ বাবে খাদ্যত চৰ্বিৰ প্ৰয়োজন। পানী দ্ৰৱণীয় ভিটামিনৰ অত্যাধিক সেৱন ক্ষতিকাৰক নহয় কিয়নো প্ৰস্ৰাৱৰ জৰিয়তে শৰীৰৰ পৰা প্ৰয়োজন নোহোৱা অতিৰিক্ত ভিটামিনৰ পৰিমাণ ওলাই যায়।
৫) অত্যাধিক ভিটামিন এ ক্ষতিকাৰক নেকি?
উঃ- ভিটামিন এ হৈছে এক চৰ্বি দ্ৰৱণীয় ভিটামিন। খাদ্য সামগ্ৰীৰ পৰা প্ৰাকৃতিক উপায়েৰে এই ভিটামিন এ গ্ৰহণ কৰিলে বিষাক্ততা নহ’ব। অৱশ্যে, চিকিৎসকৰ পৰামৰ্শ অবিহনে ভিটামিন এ পৰিপূৰকৰ নিৰ্বিচাৰ সেৱনৰ ফলত সমস্যা হ’ব পাৰে কিয়নো অত্যাধিক ভিটামিন এ-ৰ ফলত বিষাক্ততা হ’ব পাৰে।
Writer: Aparna Singha